نادرا کے قابل ٹیکس آمدنی کو بڑھانے کے دعوے مسترد

اسلام آباد (مہتاب حیدر) ایف بی آر نے نیشنل ڈیٹا بیس رجسٹریشن اتھارٹی (نادرا) کےممکنہ ٹیکس چوروں کے تیار کردہ ٹیکس پروفائلز کے ذریعےتنگ قابل ٹیس آمدنی کو بڑھانے کے دعووں کو یہ دلیل دیتے ہوئے یکسر مسترد کردیا ہے کہ ایسے پروفائلز کو محصول حالت میں تبدیل نہیں کیا جا سکتا۔ نادرا نے چند ماہ قبل قابل ٹیکس آمدنی کو بڑھانے کے امکانات کا پتہ لگانے کے لیے ایف بی آر کے ساتھ ممکنہ ٹیکس چوروں کے 3500 ٹیکس پروفائلز شیئر کیے تھے۔ ایف بی آر کے اعلیٰ افسران سے ان کے موقف کے حصول کے لیے رابطہ کیا گیا تو انہوں نے کہا کہ انہوں نے نادرا کے ٹیکس پروفائلز کا تفصیل سے تجزیہ کیا اور پایا کہ ایسے پروفائلز کو محصول حالت میں تبدیل نہیں کیا جا سکتا۔ چیئرمین نادرا طارق ملک کو دو دن پہلے ان کا موقف حاصل کرنے کے لیے سوال بھیجا گیا لیکن یہ خبر فائل کرنے تک کوئی جواب نہیں ملا۔