پراسکیوشن ڈیپارٹمنٹ کا پولیس چالان وصولی کیلئے فرنٹ ڈیسک قائم کرنیکا فیصلہ

اسلام آباد (تجزیاتی رپورٹ:حنیف خالد) حکومت پنجاب کے محکمہ پراسکیوشن نے پولیس چالانوں کی وصولی کیلئے محکمہ کے ضلعی دفاتر میں فرنٹ ڈیسک قائم کرنے کا فیصلہ کیا ہے۔ اس ضمن میں طریقہ کار طے کرنے کیلئے سیکرٹری پراسکیوشن محمد زمان وٹو نے تمام سٹیک ہولڈرز کا اجلاس سوموار کو طلب کیا ہے۔ محکمہ پراسکیوشن کی طرف سے جاری مراسلے کے مطابق اجلاس میں ڈی آئی جی انوسٹی گیشن لاہور‘ پراسکیوٹر جنرل پنجاب‘ محکمہ کے ایڈیشنل سیکرٹری صاحبان اور ڈائریکٹر جنرل انسپکشن مدعو کئے گئے ہیں۔ موجودہ سسٹم کے تحت ڈسٹرکٹ پراسکیوٹر کے دفتر میں دستی چالان جمع کرائے جاتے ہیں جس کی وجہ سے پولیس کو انتظامی اور دیگر مسائل کا سامنا کرنا پڑ رہا ہے۔ نئے سسٹم میں پراسکیوشن فرنٹ ڈیسک کو پولیس کے فرنٹ ڈیسک کے ساتھ منسلک کیا جائیگا۔