نیٹو نے ایٹمی جنگ کیلئے ضروری مشقوں کا آغاز کردیا

برسلز(نیوز ڈیسک) یوکرین پر روس کے تباہ کن حملوں کے بعد نیٹو نے ایٹمی جنگ کیلئے ضروری سمجھی جانے والی فوجی مشقیں شروع کر دی ہیں اور بحیرہ بالٹک میں اپنے جنگی بحری جہازوں کی تعداد بڑھا کر 30؍ کر دی ہے۔ نیٹو کے سیکریٹری جنرل جینس اسٹولٹن برگ نے روس پر واضح کیا کہ تنظیم کے اتحادی ممالک کے اہم انفرا اسٹرکچر پر حملوں کیخلاف بھرپور اور منظم انداز سے جواب دیا جائے گا۔ انہوں نے کہا کہ نیٹو روس کی نیوکلیئر فورسز کی نگرانی کر رہا ہے۔ برطانوی میڈیا کی رپورٹ میں بتایا گیا ہے کہ برسلز میں نیٹو کے وزرائے دفاع کے اجلاس سے دو دن قبل، صحافیوں سے بات چیت کرتے ہوئے جینس اسٹولٹن برگ کا کہنا تھا کہ جوہری حملوں کے حوالے سے روس کی چال ڈھال میں کوئی واضح تبدیلی نہیں آئی لیکن اس کے باوجود نیٹو انتہائی محتاط ہے۔ انہوں نے یوکرین پر روس کے پیر کے دن کیے گئے حملوں کو کمزوری کی علامت قرار دیا۔ انہوں نے کہا کہ اصل میں روس جنگ ہار رہا ہے اور اسی لیے یوکرینی فتوحات کو دیکھ کر اندھا دھند حملے کر رہا ہے۔ دوسری جانب نیٹو کی افواج نے بحیرہ بالٹک میں مشقیں شروع کر دی ہیں جن میں فضائیہ بھی شامل ہے۔ نیٹو کی افواج تربیتی فلائٹس میں امریکی جوہری بم کے استعمال کی پریکٹس کریں گی، تاہم ان مشقوں میں اصل بم استعمال نہیں کیے جا رہے۔