جاوید لطیف کی حفاظتی ضمانت منظور

اسلام آباد (خبر نگار) اسلام آباد ہائیکورٹ نے وفاقی وزیر جاوید لطیف کی دس ہزار روپے کے مچلکوں پر 27 اکتوبر تک حفاظتی ضمانت منظور کرتے ہوئے پولیس کو لاہور اور پشاور میں درج مقدمات میں گرفتاری سے روک دیا ہے۔ عدالت نے سیکرٹری داخلہ کو تمام صوبوں سے وفاقی وزیر کے خلاف درج مقدمات کی تفصیل منگوانے کا حکم بھی دیا ہے۔ جمعہ کو اسلام آباد ہائیکورٹ کے جسٹس محسن اختر کیانی نے سماعت کی تو وفاقی وزیر جاوید لطیف اپنے وکیل سردار تیمور اسلم کے ہمراہ عدالت میں پیش ہوئے۔ سردار تیمور اسلم ایڈووکیٹ نے کہا کہ اسی نوعیت کی ایف آئی آر میں اسی عدالت نے ایک آرڈر کر رکھا ہے۔ لاہور اور پشاور کے مقدمات کیلئے حفاظتی ضمانت چاہئے۔ دونوں صوبوں میں مخالف پارٹی کی حکومت ہے اس لئے حفاظتی ضمانت کی استدعا ہے۔ انہوں نے اپنے دلائل میں مزید کہا کہ میاں جاوید لطیف کے حلقے میں 16 اکتوبر کو الیکشن ہے ، یہ وہاں جانا چاہتے ہیں لیکن اس وجہ سے وہاں نہیں جا رہے۔ ہم چاہتے ہیں کہ ملک بھر میں درج مقدمات کی تفصیلات طلب کی جائیں۔ عدالت نے کہا کہ آپ نے حفاظتی ضمانت کی تو استدعا ہی نہیں کی ، صرف تادیبی کارروائی سے روکنے کا کہا ہے۔ جسٹس محسن اختر کیانی نے جاوید لطیف کے وکیل کو درخواست میں حفاظتی ضمانت لکھنے کی ہدایت کی جس کے بعد دہشتگردی کے دو مقدمات میں دس ہزار کے مچلکوں پر27اکتوبر تک حفاظتی ضمانت منظور کرتے ہوئے پولیس کو اس عرصہ کے دوران میاں جاوید لطیف کی گرفتاری سے روک دیا اور سیکرٹری داخلہ سے ان کیخلاف درج مقدمات کی تفصیل بھی طلب کر لی۔