پاکستان اور آسٹریلیا کے درمیان کئی عشروں سے دوستانہ تعلقات قائم ہیں،قائمقام گورنر میر جان محمد جمالی

کوئٹہ (خ ن) قائمقام گورنر میر جان محمد جمالی سے گزشتہ روز گورنر ہائوس کوئٹہ میں پاکستان میں تعینات آسٹریلیا کے ہائی کمشنر نے ملاقات کی، ملاقات کے دوران خطے کی مجموعی صورتحال، بلوچستان میں سرمایہ کاری کے مواقع اور رونمائی ہونے والی معاشی تبدیلیوں سمیت باہمی دلچسپی کے امور پر تبادلہ خیال کیا گیا۔ اس موقع پر قائمقام گورنر جان محمد جمالی نے کہا کہ پاکستان اور آسٹریلیا کے درمیان کئی عشروں سے دوستانہ تعلقات قائم ہیں اور دونوں ممالک کے درمیان معدنیات، لائیو سٹاک اور تعلیم کے شعبوں میں مزید تعلقات بڑھانے کے واضح امکانات موجود ہیں،انہوں نے کہا کہ آسٹریلیا اب بھی کئی نئے شعبوں میں ہماری مدد اور رہنمائی کر سکتا ہے، قائمقام گورنر نے آسٹریلین ہائی کمشنر کو تباہ کن بارشوں اور سیلابوں سے ہونے والے جانی و مالی نقصانات سے آگاہ کرتے ہوئے کہا کہ دوبارہ تعمیر و بحالی میں کئی سالوں کا عرصہ درکار ہے۔