پرائس کنٹرول کمیٹی کا اجلاس طلب کرنیکا مطالبہ،دودھ اور دیگر خوردنی اشیاء کے سرکاری نرخ مقرر کئے جائیں،پامیرکنزیومر سوسائٹی

کوئٹہ (اسٹاف رپورٹر) فوری طور پر پرائس کنٹرول کمیٹی کا اجلاس طلب کر کے دودھ سمیت دیگر اشیائے خورد ونوش کی قیمتوں کا تعین اور معیار کو کنٹرول کیا جائے ، پامیر کنزیومر سوسائٹی جلد خود ساختہ مہنگائی اور انتظامیہ کی خاموشی کے خلاف سخت احتجاج کر ےگی۔یہ بات پامیر کنزیومر سوسائٹی کے چیف کوآرڈینیٹر نذر بڑیچ، سینئر ڈپٹی کوآرڈینیٹر حاجی سلیم ناصر،جعفر خان کاکڑ، شاہ حسین، حاجی نظام الدین افغان، اسلم شاہ اچکزئی و دیگر نے کہی ۔ انہوں نے کوئٹہ میں دودھ مافیا کی جانب سے خودساختہ اضافے اور انتظامیہ کی مسلسل خاموشی اور پرائس کنٹرول کمیٹی کو نظر انداز کر نے کی سخت مذمت کی ہے اور فوری طور پر پرائس کنٹرول کمیٹی کا اجلاس طلب کرنے کا مطالبہ کیا ہے ۔انہوں نے کہا ہے کہ پرائس کنٹرول کمیٹی کے اجلاس میں دودھ کی قیمت کے ازسرنو تعین کے لیے تجزیاتی کمیٹی بنائی گئی،جس نے کام بھی شروع کیا لیکن کمیٹی کی رپورٹ اور فیصلہ کے بغیر دودھ کی قیمت 125 سے بڑھاکر 135 روپے کردی گئی، لیکن چند دن بعد پھر دودھ مافیا نے ماننے سے انکار کر تے ہوئے ایک دم 150 روپے فی لیٹر دودھ فروخت کرنا شروع کردیا، انتظامیہ کی مسلسل خاموشی اور دودھ مافیا کی سرپرستی کرتے ہوئےصارفین کو دودھ مافیا کے رحم وکرم پر چھوڑ دیا گیا، اب دودھ ایک بار پھر 160 اور 170 روپے تک فروخت ہورہاہے،انتظامیہ نے چند دکانداروں کو معمولی جرمانے بھی کئے ، لیکن بھر پور کارروائی نہیں کی گئی ،انہوں نے مطالبہ کیا کہ فوری طور پر پرائس کنٹرول کمیٹی کا اجلاس طلب کر کے دودھ سمیت دیگر اشیائے خورد ونوش کی قیمتوں کا تعین اور معیار کو کنٹرول کیا جائے، پامیر کنزیومر سوسائٹی جلد اس ظالمانہ اقدام اور خود ساختہ مہنگائی اور انتظامیہ کی خاموشی کے خلاف سخت احتجاج کرے گی۔