پاکستان کو پانی کے پائیدار انتظام میں چیلنج کاسامنا،مقررین

اسلام آباد (نمائندہ جنگ )بھارت اور افغانستان کے ساتھ سرحد پار پانی کی تقسیم کے مسائل پرپاکستان آبی وسائل کی تحقیقاتی کونسل (پی سی آر ڈبلیو آر) نے پالیسی ریسرچ انسٹی ٹیوٹ (آئی پی آر آئی) کے تعاون سےگزشتہ روز پینل ڈسکشن کا اہتمام کیا، چیئرمین پی سی آر ڈبلیو آر ڈاکٹر محمد اشرف نے کہا کہ پانی کے انتظام کے نامناسب طریقوں اور آب و ہوا سے پیدا ہونے والے پانی کے دباؤ کی وجہ سے پاکستان کو پانی کے پائیدار انتظام میں ایک اہم چیلنج کا سامنا ہے، سیلاب اور طویل خشک سالی کی صورت میں صورتحال مزید بگڑ گئی ہے،ڈائریکٹر ریسرچ آئی پی آر آئی بریگیڈیئر راشد ولی جنجوعہ نے بھی خطاب کیا، پینل ڈسکشن سیشن کی نظامت ڈاکٹر راشد آفتاب، ڈائریکٹر رفاہ انسٹی ٹیوٹ آف پبلک پالیسی نے کی، بحث کے کلیدی پینلسٹ علی توقیر شیخ، کنسلٹنٹ ورلڈ بینک ڈاکٹر عظیم شاہ، ڈاکٹر شکیل درانی تھے، سابق چیئرمین واپڈا ارشد ایچ عباسی، توانائی اور پاور سیکٹر کے ماہرین نے بھی شرکت کی، اس بات پر غور کیا گیا کہ بھارت اور افغانستان کے ساتھ بہتر مذاکرات کے لیے داخلی تکنیکی اور قانونی صلاحیت کو فروغ دینے کے لئے ہمارے قومی اتحادی اداروں کو مضبوط کرنے کی ضرورت ہے،پینلسٹس نے پاکستان کو درپیش سرحدی چیلنجز کے مختلف پہلوؤں پر بات چیت کی اور تجویز پیش کی کہ موجودہ معاہدے کے تحت تعاون کو بہتر بنا کر مشترکہ پانیوں کا پائیدار انتظام کیا جا سکتا ہے، متعدد آبی ماہرین، اسٹیک ہولڈر تنظیموں کے پیشہ ور افراد اور یونیورسٹی کے طلباء نے پینلسٹ کے ساتھ سوال جواب کے سیشن میں بھی حصہ لیا۔