وزیر اعظم شہباز شریف کی ڈاکٹرتوقیر شاہ اورسردار ریاض مزاری کی رہائشگاہ آمد،اظہارتعزیت

اسلام آباد( نیوز رپورٹر) وزیر اعظم محمد شہباز شریف سیکرٹری ٹو پرائم منسٹر ڈاکٹر سید توقیر شاہ کی رہائش گاہ گئے اور ان کی والدہ کے انتقال پر تعزیت کا اظہار کیا۔ بدھ کو وزیراعظم آفس کے میڈیا ونگ سے جاری بیان کے مطابق وزیراعظم نے مرحومہ کیلئے فاتحہ خوانی اور بلندی درجات کی دعاکی۔ ادھر وزیر اعظم محمد شہباز شریف رکن قومی اسمبلی سردار ریاض محمود خان مزاری کی رہائش گاہ پر گئے اور ان کے والد سابق نگران وزیر اعظم سردار بلخ شیر مزاری کی وفات پر تعزیت کا اظہار کیا۔وزیر اعظم نے کہا کہ سردار بلخ شیر مزاری کی ملک کے لئے بےمثال خدمات تھیں جنہیں مدتوں یاد رکھا جائےگا ۔ انہوں نے مرحوم سردار بلخ شیر مزاری کی مغفرت اور بلندی درجات کیلئے دعا بھی کی۔