ترکئی خاندان کے مابین سیاسی اختلافات ختم کرنے کیلئے گرینڈ جر گہ تشکیل

صوابی( نمائندہ جنگ)معرو ف ترکئی خاندان کے مابین سیاسی اختلافات ختم کرنے کے لئے ایک گرینڈ جر گہ تشکیل دیدیا گیا۔ جر گہ نے دونوں خاندانوں کے ساتھ الگ الگ ملاقاتیں کی اور انہیں میڈیا پر ایک دوسرے کے خلاف بیان بازی اور تقریر کرنے پر پابندی لگا دی۔اراکین جر گہ چیر مین ڈی آر سی آفسر خان اراکین حاجی امت خان جدون ، سید قاسم باچا ، محمد رشا، کشور زمان ، سہیل احمد ، سلیم علی زئی ، فضل حسین ، اکبر علی ، عمر گل ، سلیم اکبر ، غنی محمد، گل نثار ، نفیس الرحمن اور دیگر نے دونوں خاندانوں کے ساتھ راضی نامے کے حوالے سے الگ الگ ملاقاتیں کی اراکین جر گہ نے سابق ایم این اے عثمان ترکئی، حاجی بلندا قبال ترکئی اور حکم خان کے حجرے میں جا کر طویل ملاقات کی۔ اس موقع پر بلند اقبال ترکئی نے جر گہ کو مکمل اختیار دیتے ہوئے کہا کہ ہم پختون ہے اور پختون روایات اور جر گہ کی قدر کر تے ہیں جب کہ بعد ازاں اراکین جر گہ نے ترکئی ہائوس میں سینیٹر لیاقت خان کے صاحبزادے اور صوبائی وزیر تعلیم شہرام خان ترکئی کے بھائی فیصل خان ترکئی اور ان کے چچا ولایت خان ترکئی کے ساتھ بھی ملاقات کی۔ انہوں نے جر گہ کی کوششوں کو سراہا اور کہا کہ اس سلسلے میں بہت جلد سینیٹر لیاقت خان ترکئی اور ایم پی اے محمد علی خان ترکئی کے ساتھ اجلاس ہو گا۔ جس میں دونوں خاندان کے مابین راضی نامے کے حوالے سے موقف پیش کیا جائیگا یاد رہے کہ گذشتہ ماہ شاہ زیب شہید ڈگری کالج شیوہ کے افتتاح کے موقع پر ایم این اے عثمان خان ترکئی ، حاجی بلند اقبال ترکئی اور شہرام خان ترکئی کے خاندانوں کے مابین افتتاح کے حوالے سے اختلافات کھل کر سامنے آئے تھے۔ جس میں بعد ازاں اس سیاسی اختلافات میں شدت اختیار کر لی۔