پرتگال، انسانی اسمگلنگ، منی لانڈرنگ کے الزام میں 35 افراد گرفتار

لزبن (اے ایف پی) پرتگال میں حکام نے انسانی اسمگلنگ، منی لانڈرنگ اور جعلی دستاویزات رکھنے کے الزام میں 35 افراد کو گرفتار کرلیا ہے، یہ اعلان بدھ کے روز مقامی پولیس نے کیا،پرتگالی حکام نے بتایا کہ انسانی اسمگلنگ کا شکار ہونے والے درجنوں افراد کا تعلق الجزائر، بھارت، مالدووا، مراکش، پاکستان، رومانیا اور سینیگال سے ہے۔ پولیس نے بتایا کہ ملزمان ایک جرائم پیشہ گروپ کا حصہ ہیں جو تارکین وطن کو ان کے آبائی ممالک سے فارمز میں کام کے مواقعوں کا بتا کر انہیں بھلا پھسلا کر النتیجو کے خطے میں لے آتے ہیں۔ ملزمان میں پرتگال سمیت یورپ کے دیگر علاقوں سے تعلق رکھنے والے مرد وخواتین دونوں شامل ہیں یہ تارکین وطن انتہائی غیر انسانی صورتحال میں کام کرنے پر مجبور ہیں، انہیں انتہائی کم تنخواہ دی جاتی ہے اور خستہ حال مکانوں میں رہائش پذیر ہیں۔