146زرعی منڈیوں کوآپس میں لنک کیا جا رہا ہے:وزیرزراعت

لاہور(خصوصی رپورٹر) صوبائی وزیر زراعت سید حسین جہانیاں گردیزی نے جڑانوالا فیصل آبادمیں فروٹ و سبزی منڈی کا افتتاح کرتے ہوئے کہا کہ صوبہ میں 146زرعی منڈیوں کو آپس میں لنک کیا جا رہا ہے،ان ماڈل منڈیوں میں کاشتکاروں کی فلاح کے پیش نظر کسان پلیٹ فارم کا قیام او اینڈرائیڈ ایپلکیشن منڈی ایپ کے ذریعے مارکیٹ فیس وصولی کا ریکارڈ مرتب کیا جا رہا ہے تاکہ مڈل مین کا کردار محدود کیا جا سکے اور کاشتکاروں کو محنت کا پورا معاوضہ مل سکے۔ نئی فروٹ و سبزی منڈیاں ترجیحاً گاؤں کے پاس قائم کی جا رہی ہیں تاکہ کاشتکاروں کو اپنی اجناس کی فروخت کیلئے دشواری کا سامنا نہ کرنا پڑے۔ زرعی منڈیوں سے ناجائز تجاوزات سے پاک رکھنے کے تمام تر انتظامات کئے گئے ہیں اور مارکیٹ فیس کا شیڈول،کمیشن اور روزانہ کے نرخ واضح جگہوں پر آویزاں کئے جا رہے ہیں۔