ہائبرڈ بیجوں کی تیاری کیلئےپاکستان کیساتھ تعاون جاری رہیگا

لاہور (اپنے نامہ نگار سے)چین کے قونصل جنرل ژاو شیرین نے کہا ہے کہ بمپر پیداوار والے چاول کے ہائبرڈ بیج کی بہترین کوالٹی کی مزید نئی اقسام تیار کرنے کے لیے چین پاکستان کے ساتھ تعاون جاری رکھے گا۔ پاکستان کو زرعی میدان میں چین کے نجی شعبے کی کامیابیوں سے فائدہ اٹھانا چاہیے اور زرعی شعبے میں سرمایہ کاری کے وسیع مواقع موجود ہیں۔ چین کو اس بات پر فخر ہے کہ گارڈ ایگریکلچرل ریسرچ اینڈ سروسز نے چین کے ادارے لونگپنگ ہائی ٹیک انڈسٹریز کے اشتراک سے پہلی مرتبہ چاول کے ہائبرڈ بیج تیار کیے ہیں۔ اس موقع پر گارڈ ایگریکلچرل ریسرچ اینڈ سروسز کے سی ای اونے کہا کہ گارڈ ایگریکلچرل ریسرچ اینڈ سروسز پاکستان میں ہائبرڈ موٹے چاول کے بیج کو متعارف کرانے میں پیش پیش ہے جس نے ایک نیا ایکسٹرا لانگ گرین سپر ہائبرڈ بیج تیار کیا ہے جو زیادہ گرمی برداشت کر سکتا ہے،جس کی فی ایکڑ پیداوار عام بیج کے مقابلے میں دوگنا ہے اور یہ پکانے کے بعد دوگنا لمبا ہو جاتا ہے۔