سندھ، جامعات میں طلبہ یونین کی بحالی کیلئے وائس چانسلرز اجلاس طلب

کراچی (سید محمد عسکری) سندھ حکومت نے صوبے کی سرکاری جامعات میں طلبہ یونین کی بحالی کیلئے 27؍ جامعات کے وائس چانسلرز کا اجلاس 28؍ نومبر کو 12؍ بجے طلب کرلیا ہے جس کی صدارت صوبائی وزیر بورڈز و جامعات اسماعیل راہو کریں گے۔ اجلاس میں جامعات میں طلبہ یونینوں کی بحالی کے فیصلے کے نفاذ کا طریقہ کار طے کیا جائے گا۔ یاد رہے کہ صوبائی کابینہ اور سندھ اسمبلی طلبہ یونین بحالی کا بل منظور کرچکی ہیں تاہم 1984ء سے قبل قائم ہونے والی تمام جامعات جن کی تعداد 7سے بھی کم ہے کہ ایکٹ میں طلبہ یونین اور ان کے عہدیداروں سے متعلق شق موجود ہے تاہم اب جامعات کی تعداد 27ہوگئی ہے لیکن ان 20جامعات کے ایکٹ میں طلبہ یونین کا ذکر ہی نہیں ہے۔ یہ بھی یاد رہے کہ 9؍ فروری 1984ء میں ڈکٹیٹر جنرل ضیاء الحق نے طلبہ یونینوں پر پابندی عائد کردی تھی پابندی سے قبل جامعہ کراچی کی سنڈیکیٹ میں طلبہ یونین کے 2؍ ارکان ہوتے تھے جن میں ایک جامعہ کراچی کا صدر اور دوسرا الحاق شدہ کالجوں کا صدر ہوتا تھا۔ 1984ء سے جامعہ کراچی کے سنڈیکیٹ میں طلبہ کی نمائندگی نہیں ہے۔