عمران خان کو ہیلی پیڈ سروسز نہیں دے سکتے، یہ انتظامیہ کا کام، اسلام آباد ہائیکورٹ

اسلام آباد (نمائندہ جنگ) اسلام آباد ہائیکورٹ کے چیف جسٹس عامر فاروق نے تحریک انصاف کی پریڈ گراؤنڈ میں عمران خان کے ہیلی کاپٹر کو اترنے کی اجازت دینے سے متعلق کیس میں ریمارکس دیتے ہوئے کہا ہے کہ عمران خان کو ہیلی پیڈ سروسز نہیں دے سکتے ، یہ انتظامیہ کا کام ہے، انہوں نے جو کرنا ہے قانون کے مطابق ہی کرینگے ، میں یہ تو نہیں کہوں گا کہ قانون کے مطابق نہ کریں۔ بدھ کو اسلام آباد ہائیکورٹ کے چیف جسٹس عامر فاروق نے پی ٹی آئی کی مذکورہ بالا درخواست کی سماعت کی تو پی ٹی آئی کے وکیل عتیق الرحمن نے بتایا کہ تحریک انصاف نے 26 نومبر کیلئے راولپنڈی میں جلسے کی کال دی ہے۔ ہم نے اسلام آباد کی انتظامیہ کو عمران خان کا ہیلی کاپٹر پریڈ گراونڈ میں اترنے اور راولپنڈی جانے کیلئے اسلام آباد سے گزرنے کی اجازت مانگی ہے مگر انتظامیہ نے ابھی تک اجازت نہیں دی، چیف جسٹس عامر فاروق نے استفسار کیا کہ جو درخواست آپ نے انتظامیہ کو دی وہ ابھی مسترد تو نہیں ہوئی؟ پی ٹی آئی کے وکیل نے کہا کہ ہم نے درخواست دی ہے مگر ابھی تک اجازت نہیں ملی۔