ڈیفنس، پولیس اہلکار کے قتل کے ملزم کے سہولت کار برادر نسبتی اور ملازم گرفتار

کراچی(اسٹاف رپورٹر )ڈیفنس میں پولیس اہلکار کے قتل میں ملوث ملزم خرم نثار کی سہولت کاری کرنیوا لےبرادر نسبتی عامر اور ملازم اورنگزیب کو باقاعدہ گرفتار کر لیا ۔ تفتیشی پولیس کے مطابق ملازم اورنگزیب نے واردات کے بعد ملزم کےگھر پہنچنے پر ملزم کی گاڑی سے نمبر پلیٹ اتاری، گاڑی پر کپڑا ڈالا اور گاڑی کی چابی چھپادی، ملزم جب تک پاکستان میں تھا ملازم اورنگزیب اس سے رابطے میں رہا، پولیس حکام کا کہنا ہے کہ ملزم کا برادر نسبتی کلفٹن میں ہی ایک ریسٹورنٹ چلاتا ہے، ملزم خرم واردات کے بعد گھر سے سیدھا پہلے عامر کے ریسٹورنٹ گیا، ملزم خرم نثار اور اس کے برادر نسبتی کے درمیان ریسٹورنٹ میں ملاقات ہوئی ، عامر نے بیان دیا کہ خرم نثار نے بتایا کہ اس کا کوئی جھگڑا ہوا ہے اسے فوراً ٹکٹ چاہئے لیکن خرم کو ٹکٹ لے کر دینے میں  کوئی مدد نہیں کی،عامر کا کہنا ہے کہ میں اپنی فیملی کو چھوڑنے ایئر پورٹ گیا تو خرم موجود تھا، ملزم اور عامر کی ایئرپورٹ پر بھی ملاقات ہوئی تھی، پولیس کا کہنا ہے کہ عامر اور ملزم خرم کا کال ریکارڈ ڈیٹا بھی حاصل کر لیا ہے، ملزم خرم اور عامر دونوں ایک دوسرے سے رابطے میں تھے، ملزم کا برادر نسبتی عامر بھی سوئیڈن کا شہری ہے،پولیس حکام کایہ بھی کہنا ہے کہ ملزم خرم نثارکے بیرون ملک جانے کے حوالے سے غیر ملکی ایئر لائن اور غیرملکی بینک سے بھی تفصیلات طلب کی ہیں، ملزم کے والدین بھی اب اپنے گھر میں موجود نہیں ہیں، ملزم کے برادر نسبتی عامر کے بیان کی تصدیق جاری ہے۔