چینی کی قلت نہیں، پنجاب شوگر انڈسٹری اور نیشنل فوڈ سیکیورٹی کا مشترکہ موقف

اسلام آباد (حنیف خالد) پاکستان شوگر انڈسٹری کے ترجمان نے کہا ہے کہ ملک میں اس وقت بارہ لاکھ ٹن فاضل چینی موجود ہے۔ پاکستان شوگر ملز ایسوسی ایشن پنجاب زون اور وزارت نیشنل فوڈ سکیورٹی اینڈ ریسرچ کا یکساں موقف ہے کہ ملک میں چینی کی قطعاً کوئی قلت نہیں۔ ترجمان کا کہنا ہے کہ شوگر انڈسٹری تقریباً ایک سال سے حکومت کو بار بار بتاتی چلی جا رہی ہے کہ اس اضافی چینی کو برآمد کر کے ایک ارب ڈالر کے لگ بھگ زرمبادلہ حاصل کر لے تاکہ شوگر ملیں بروقت کرشنگ کا آغاز کر سکیں اور کسانوں کو ادائیگیوں میں رکاوٹ نہ آئے۔ موجودہ مقدار بارہ لاکھ ٹن کا تعین ایف بی آر کے ٹریک اینڈ ٹریس سسٹم کے ذریعے کیا جا سکتا ہے۔