ینگ پارلیمنٹرینز فورم جمہوری اقدار کیلئے کردار ادا کر سکتا ہے ،علی موسیٰ گیلانی

اسلام آباد(نمائندہ خصوصی) ینگ پارلیمانی فورم کے صدر ممبر قومی اسمبلی سید علی موسیٰ گیلانی نے کہا کہ ملکی آبادی کا بڑا حصہ نوجوانوں پر مشتمل ہے اور اس حوالے سے ینگ پارلیمنٹرینز فورم ملک میں جمہوری اقدار کے فروغ کے لیے اہم کردار ادا کر سکتا ہے۔انہوں نے ان خیالات کا اظہار نوجوان پارلیمنٹرینز فورم، ہنس سیڈل فاؤنڈیشن اور نیشنل ڈائیلاگ فورم کے اشتراک سے پارلیمنٹ ہاؤس میں منعقدہ مکالمے کے افتتاحی اجلاس سے خطاب کرتے ہوئے کیاجس کا موضوع پارلیمانی ڈپلومیسی جمہوریت کی مضبوطی کیلئے مؤثر ہتھیار تھا۔ سٹیفن کڈیلا صدر ہنس فاؤنڈیشن نے کہا کہ جرمن عوام اور حکومت پاکستان کے عوام کے ساتھ ہیں جو تاریخ کے تباہ کن سیلاب کا سامنا کر رہے ہیں۔ شہریار خان ڈائریکٹر نیشنل ڈائیلاگ نے مکالمے کے انعقاد کے لیے قومی اسمبلی سیکرٹریٹ کی جانب سے تعاون کو سراہا۔ ایڈیشنل سیکرٹری قومی اسمبلی برائے خصوصی اقدامات سید شمعون ہاشمی نےکہا کہ پاکستان کی پارلیمنٹ نے پارلیمانی ڈپلومیسی کے ذریعے موسمیاتی انصاف کے حصول کے لیے اہم کردار ادا کیا ہے۔انہوں نے مکالمے کے شرکاء کو جعلی پروپیگنڈے سے نمٹنے کے لیے موثر قانون سازی کی ضرورت سے بھی آگاہ کیا۔ مکالمے میں سنیٹرز ثناء جمالی اور عمر فاروق، ممبران قومی اسمبلی رومینہ خورشید عالم، سیدہ نوشین افتخار، عالیہ کامران، نوید عامر جیوا، رانا ارادت شریف اور مختلف شعبوں کے تحقیقی ماہرین نے شرکت کی۔