سرمایہ کاروں کو تحفظ، کاروبار دوست پالیسی متعارف کرائینگے، قیوم نیازی

14 جنوری ، 2022

اسلام آباد، مظفر آباد (صباح نیوز) وزیراعظم آزادجموں کشمیر سردار عبدالقیوم خان نیازی نے کہا ہے کہ آزاد کشمیر میں سرمایہ کاری کے وسیع مواقع موجود ہیں، تاجروں کے مسائل ترجیحی بنیادوں پر حل کرنے کے لیئے اقدامات کررہے ہیں، آزاد کشمیر میں انڈسٹری کو فروغ دینے کے لیے سرمایہ کاروں کو تحفظ دیں گے، جامع پالیسی بنانے کے لیے جلد تاجروں کا اجلاس بلایا جائے گاجس میں آزادکشمیر بھر سے چیمبر آف کامرس کے نمائندگان اور متعلقہ حکام موجود ہونگے، کاروبار دوست پالیسی متعارف کروائیں گے، تاجروں کو بھرپور مراعات دیں گے، تاجروں اور انڈسٹری کی مضبوطی سے خطے میں خوشحالی کا آغاز اور بے روزگاری کا خاتمہ ہوگا۔ ان خیالات کا اظہار انہوں نے میرپور چیمبر آف کامرس اینڈ انڈسٹری کے وفد سے گفتگو کرتے ہوئے کیا۔ وفد کی قیادت صدر میرپور چیمبر آف کامرس اینڈ انڈسٹری فیصل منظور نے کی۔ وزیراعظم آزادکشمیر نے ترجیحی بنیادوں پر مسائل کے حل کی یقینی دہانی کرائی۔ دریں اثناءوزیراعظم آزاد کشمیر نے آزادکشمیر کے مختلف علاقوں میں بجلی کی بندش کا نوٹس لے لیا۔ وزیراعظم نے متعلقہ حکام سے رپورٹ طلب کرتے ہوئے ہدایت کی کہ فی الفور متاثرہ علاقوں میں بجلی کی سپلائی بحال کی جائے۔ برفباری اور لینڈ سلائیڈنگ سے متاثرہ برقی لائنوں کی مرمت کا کام تیز کیا جائے۔برقیات کا عملہ دن رات ایک کر کے بجلی کی ترسیل کو بحال کرے۔