عوام مہنگائی سے مررہے ہیں،حکمرانوں کو خوف خدا نہیں،جاوید قصوری

لاہور (صباح نیوز)امیر جماعت اسلامی پنجاب وسطی محمد جاوید قصوری نے کہا ہے کہ ملک کے عوام مہنگائی ،بے روزگاری اور لاقانونیت کے ہاتھوں مجبور ہو کر خود کشیاں کررہے ہیں جبکہ حکمرانوں نے بے حسی کی چادر اوڑھ رکھی ہے۔ انہیں خوف خدا نہیں۔ آئی ایم ایف کے پاس جانے کی بجائے خودکشی کا دعویٰ کرنے والا وزیرا عظم آج آئی ایم ایف کا سب سے بڑا ٓلہ کار بنا ہوا ہے۔ ان خیالات کا اظہار انہوں نے گزشتہ روز مختلف عوامی وفود سے گفتگو کرتے ہوئے کیا۔ انہوں نے کہا کہ ہر شعبہ کسمپرسی کا شکار ہے۔ یوریا کھاد بحران دن بدن سنگین ہوتا چلا جارہا ہے۔ سرکاری قیمت 1768روپے ہے مگر مارکیٹ میں 4ہزار سے کم میں فروخت نہیں ہورہی ۔ اس پر مستزادحکومتی کے ترجمانوں کے عجیب و غریب اور گمراہ کن دعوے سامنے آرہے ہیں ۔ حکومت اپنی ناکامی کا بوجھ دوسروں پر ڈال کر بری الذمہ ہونا چاہتی ہے ۔زراعت ملکی معیشت میں ریڑھ کی ہڈی کی صلاحیت رکھتی ہے۔ اس کے ساتھ سوتیلی ماں جیسا سلوک ناقابل برداشت ہے۔ انہوں نے کہا کہ سونامی حکومت کے پاس مہنگائی کا کوئی توڑ نہیں۔ ظالم حکمرانوں نے پاکستان کو دنیا کا چوتھا مہنگا ترین ملک بنادیا ہے۔ اب وقت آگیا ہے کہ عوام اپنے حقیقی نمائندوں کو پہچانیں۔ محمد جاوید قصوری نے اس حوالے سے مزید کہا کہ یوں محسوس ہوتا ہے کہ جیسے حکمرانوں نے عوام کو رولانے اور معیشت تباہ کرنے کی قسم کھا رکھی ہے۔ وزیر اعظم نے وہ طلسماتی چشمہ پہن رکھا ہے جس سے عوام کی مشکلات کا احساس ہی نہیں، انھیں ہر طرف تباہی کی بجائے خوشحالی ہی نظر آرہی ہے۔ پی آئی اے نے 462ارب روپے کا مقروض ہے جبکہ حکومت نئے جہاز لینے کی پلاننگ کر رہی ہے۔ ان کے پاس وژن نام کی کوئی چیز نہیں۔