سندھ میں کورونا کی شرح 18.7 ہوگئی، 88 فیصد کراچی سے رپورٹ، حکومت سختی سے گریزاں

کراچی(خبرایجنسی، جنگ نیوز)سندھ میں کورونا کی شرح18.7ہوگئی ، صوبے کے کل کیسز کا 88 فیصد کراچی سے رپورٹ ،حکومت سختی سے گریزاں،مزید 2289افراد وائرس کا شکار،فعال کیسز بڑھ کر 15ہزار سے متجاوز، مزید 2 مریض دم توڑ گئے، لاہور میں بھی نئے کورونا کیسز میں تیزی سے اضافہ ہونے لگا۔ گزشتہ روز وزیر اعلیٰ سندھ سید مراد علی شاہ نے ایک بیان میں کہا کہ کورونا وائرس کے مزید دو مریض اپنی جان سے ہاتھ دھو بیٹھے جس سے اموات کی تعداد 7693 ہوگئی ہے، 12229 نئےٹیسٹ کئے گئے جس میں سے 2289 کیسز کا پتہ چلا جوکہ موجودہ تشخیصی شرح کا 18.7 فیصد ہے،اس وقت 15375 مریض زیر علاج ہیں ، 172 مریضوں کی حالت تشویشناک بتائی گئی ہے جن میں سے 14 کو وینٹی لیٹرز پر منتقل کیا گیا ہے۔ بیان کے مطابق 2289 نئے کیسز میں سے 2009 کا تعلق کراچی سے ہے ،ادھر وزیراعلیٰ سندھ نے صوبے کے عوام پر زور دیا کہ وہ ایس او پیز پر عمل کریں تاہم ذرائع کاکہناہےکہ حکومتی مشینری شہریوں سے ایس او پیز پرعمل درآمد کروانے کیلئے سنجیدہ نظر نہیں آرہی، صوبے میں کورونا کی شرح 18سے تجاوز کر رہی ہے اور صوبے کے کل کیسزکا 88 فیصد کراچی سے رپورٹ ہورہے ہیں اور روز بروز اس تعداد میں تیزی دیکھی جارہی ہے۔