پی اے سی ، مرغیوں کے ویسٹ کاتیل کئی ہوٹلوں میں استعمال ہونے کاانکشاف

اسلام آباد( کامرس رپور ٹر ) پارلیمنٹ کی پبلک اکائونٹس کمیٹی میں مرغیوں کے ویسٹ(انتڑیوں، سر اور پنجوں) سے بنایا جانے والا تیل کئی ہوٹلوں کےکھانوں میں استعمال ہونے کاانکشاف ہوا ہے، کمیٹی نے پاکستان سٹینڈرڈ اینڈ کوالٹی کنٹرول اتھارٹی کو معاملے کا جائزہ لے کر کارروائی کرنے کی ہدایت کر دی۔چیئرمین کمیٹی نے آڈٹ نہ کرانے والے اداروں کی فہرست طلب کرلی چیئرمین نیب 26جنوری کو بریفنگ کیلئےطلب کرلئے گئے جبکہ رانا تنویر نے کہا کہ آڈیٹر جنرل آفس آڈٹ کی ہدایت کی گئی ہے ۔جمعرات کو کمیٹی کا اجلاس رانا تنویر حسین کی صدارت میں ہوا، جس میں وزارت سائنس اینڈ ٹیکنالوجی کے سال 2019-20 کے آڈٹ اعتراضات کا جائزہ لیا گیا، ایاز صادق نے وزارت سائنس اینڈ ٹیکنالوجی حکام سے کہا کہ بھنگ والی سٹوری تو سنائیں؟جس پر حکام نے بھنگ کے حوالے سے ارکان کو بریفنگ دی۔ سید حسین طارق نے کہا کہ آج کل چکن کے ویسٹ سے آئل بنا کر کہا جاتا ہے کہ صابن کے لئے دے رہے ہیں لیکن پھر یہی آئل کھانے میں ہوٹلوں میں استعمال ہو رہا ہے، بہت ساری فیکٹریز چل رہی ہیں، ان پر کوئی کنٹرول نہیں،آئل ٹینکر کے اندر بھرا جارہا ہے۔ ، پی اے سی نے آڈیٹر جنرل آفس کا بھی آڈٹ کرانے کی ہدایت کی ہے ،نیشنل بنک سمیت 9سے 10اداروں کے آڈٹ کرانے کی فہرست تیار کی ہے، چیئرمین پی اے سی نے یوٹیلٹی سٹورز پر غیر معیاری خوردنی تیل اور گھی کی فروخت پر شدید تحفظات کا اظہار بھی کیا۔