حقیقی معاشی ترقی کیلئےمستحکم کرنسی ضروری ہے:لاہور چیمبر

لاہور (سپیشل رپورٹر ) لاہور چیمبرکے صدر میاں نعمان کبیر نے خدشہ ظاہر کیا ہے کہ اگر روپے کی قدر مستحکم کرنےکیلئے ٹھوس اقدامات نہ اٹھائے گئے تو نہ صرف پورا معاشی پہیہ متاثر ہوگا بلکہ سرمایہ کاروں کا اعتماد بھی متزلزل ہوگا۔ اور وہ نئے منصوبوں میں سرمایہ کاری سے گریز کریں گے۔حقیقی معاشی ترقی کیلئے مستحکم کرنسی بہت ضروری ہے۔ رواں مالی سال کے آغاز سے ڈالر کے مقابلہ روپے کی قدر 10 فیصد کم ہوئی ہے، چونکہ صنعت کا انحصاردرآمدی خام مال، پرزہ جات اور مشینری پر ہے اس لیے پیداواری لاگت اور تجارتی خسارے میں اضافہ ہوا ہے۔ روپے کی قدر مستحکم کرنے کیلئےغیرضروری اور پرتعیش اشیا ءکی درآمدات کم کی جائیں، سٹیٹ بینک اپنا کردار ادا کرے اور چین کے ساتھ کرنسی سویپ پر کام کیا جائے اور برآمدات بڑھانے کیلئے حکمت عملی وضع کی جائے۔