حکومت کھاد بحران پیدا کر کے فوڈ سیکورٹی کو داؤ پر لگا رہی ہے، پیپلز پارٹی

لاہور(سپیشل رپورٹر )پیپلز پارٹی وسطی پنجاب کے جنرل سیکرٹری اور ٹریکٹر ٹرالی مارچ کی آرگنائزنگ کمیٹی کے ممبر سید حسن مرتضیٰ نے کہا ہے کہ پیپلز پارٹی کا ساہیوال ڈویژن میں ٹرالی مارچ 21جنوری کو ہی ہو گا جبکہ پنجاب سمیت ملک بھر کے ڈویژنل مقامات پر ٹرالی مارچ 24جنوری کوہو گا،پیپلز پارٹی کسانوں کو حکومتی موشگافیوں کا شکار نہیں ہونے دیگی ،حکمران کھاد بحران پیدا کر کے ملک کی فوڈ سیکورٹی کو داؤ پر لگا رہے ہیں،یہ حکومت رہی تو ہمیں گندم ،چینی کی طرح نمک مرچ بھی درآمد کرنے پڑینگے،نالائقوں کے ٹولے کا ہر دن ملک و قوم پر عذاب بن کر گزر رہا ہے۔عوامی لانگ مارچ سے پہلے ہی حکومتی ایوانوں سے چیخیں بلند ہونا شروع ہوگئیں ،پیپلزپارٹی کی قیادت نے کہا تھا کہ ہمیں حکومت گرانے کی ضرورت نہیں ہے یہ اپنے وزن سے گریں گے، پرویز خٹک اور وزیراعظم کے درمیان ہونے والی تلخ کلامی حکومتی ایوانوں میں مچنے والی کھُلبلی کی ایک جھلک ہے،قوم انتظار میں ہے کہ اب استعفیٰ خٹک دے گا یا خان دے گا۔اسی دوران اراکین اسمبلی سید نوید قمر،شازیہ مری،نوابزادہ افتخار احمد خان اور سابق صوبائی وزیر کے پی شجاع خان نے سندھ ہاؤس اسلام آباد میں پریس کانفرنس سے خطاب کرتے ہوئے کہاپاکستان میں ر زراعت کا شعبہ بحران کا شکار ہے ،کسان سراپا احتجاج ہیں لیکن نالائق حکومت پر اسکا کوئی اثر نہیں پڑ رہا،چینی بحران کی طرح کھاد بحران بھی حکومت کا خود پیدا کردہ ہے، اصل کام زراعت کے شعبہ میں خود کفیل ہونا ہے،پیداواربڑھانے ہی سے مہنگائی کم ہوگی، 27 فروری کو ہم نے لانگ مارچ کا اعلان کررکھا ہے، کسان مارچ بھی اس سلسلہ کی کڑی ہے۔ باہر سے جو گندم امپورٹ کی جاتی ہے اتنا ہی اس کا کرایہ ادا کرنا پڑتا ہے لہٰذا حکومت اس حوالے سے اقدامات کرے۔