حریم شاہ کے وڈیو میں لہرائے گئے برطانوی پائونڈ منی لانڈرنگ کا پیسہ نہیں، دانیال ملک

لندن (مرتضیٰ علی شاہ) 2018ء کے عامانتخابات میں تحریک انصاف کے امیدوار اور کاروباری شخصیت دانیال ملک نے وضاحت کی ہے کہ ٹک ٹاک اسٹار حریم شاہ نے وڈیو میں جو برطانوی پائونڈ اسٹرلنگ لہرائے اور دکھائے، وہ رقم ان کی اپنی ہے اور کوئی منی لانڈرنگ کا پیسہ نہیں ہے۔ اس طرح وڈیو اور اس میں دکھائی جانے و الی رقم نے اپنی نوعیت کے حو الے سے نیا رخ اختیار کرلیا ہے۔ دانیال ملک نے اپنے ایک انٹرویو میں حریم شاہ کا دفاع کیا، جو تعطیلات پر برطانیہ میں اپنے کزن کے گھر مقیم ہیں۔ انہوں نے کہا کہ وڈیو میں دکھائے گئے ہزاروں پائونڈ جائز، قانونی اور شفاف ہیں۔ مذکورہ رقم دانیال ملک کے مطابق انہوں نے ’’فن وڈیو‘‘ بنانے کے لئے حریم شاہ کو دی تھی حریم شاہ ان کے لئے چھوٹی بہن کی طرح ہے انہوں نے پاکستان کے وزیرداخلہ شیخ رشید احمد سے کہا کہ وہ حریم شاہ کو ہدف بنانے کے بجائے اصل قانون شکنوں کو شکنجے میں جکڑیں۔