وزیر اعلیٰ پنجاب محکمہ جیل خانہ جات میں انقلابی اقدامات کے بانی ہیں، فیاض چوہان

لاہور(اپنے نامہ نگار سے)وزیرِ جیل خانہ جات پنجاب فیاض الحسن چوہان نے کہا ہے کہ وزیرِ اعلیٰ پنجاب سردار عثمان بزدار محکمہ جیل خانہ جات میں انقلابی اقدامات کے بانی ہیں۔ وزیرِ اعلیٰ پنجاب کے پرزنز ڈیپارٹمنٹ کے لیے انقلابی اقدامات تاقیامت یاد رکھے جائیں گے۔ گزشتہ حکومتوں نے ستر سال سے محکمہ جیل خانہ جات سے لاوارثوں جیسا سلوک کیا لیکن سردار عثمان بزدار کی قیادت میں جیل ملازمین اور قیدیوں کی فلاح و بہبود کا سفر پوری طرح سے جاری ہے۔ ان خیالات کا اظہار انہوں نے ایک اعلیٰ سطحی محکمانہ اجلاس کی صدارت کرتے ہوئے کیا۔ اس موقع پر انہوں نے کہا کہ جیل ملازمین کی چھٹیوں کے نام پر رشوت ستانی ناقابلِ برداشت ہے، قواعد و ضوابط کے مطابق چھٹیوں میں رکاوٹ پر سخت ایکشن لیا جائے گا۔ فیاض چوہان نے آئی جی جیل خانہ جات پنجاب مرزا شاہد سلیم بیگ کو اس ضمن میں فوری نوٹیفیکیشن جاری کرنے اور محکمہ کے تمام ملازمین تک پہنچانے کی خصوصی ہدایت کی، انہوں نے کہا کہ آئندہ جیل ملازمین کی جائز چھٹیوں میں رکاوٹ پر متعلقہ سپرنٹنڈنٹ جواب دہ ہو گا۔