پاکستان میں میڈیا انڈسٹری تیزی سے نمو پا رہی ہے،سیکرٹری اطلاعات

اسلام آباد ( نمائندہ جنگ ) وفاقی سیکرٹری اطلاعات و نشریات شاہیرہ شاہد نے کہا ہے کہ میڈیا انڈسٹری میں رونما ہونیوالی تبدیلیاں اس بات کی متقاضی ہیں کہ وزارت کے افسران دور جدید کے میڈیا چیلنجز سے نبرد آزما ہونے کیلئے خود کو تیار کریں،یہ بات انہوں نے انفارمیشن سروس اکیڈمی میں 32 ویں مڈ کیریئر مینجمنٹ کورس ڈومین سپیسیفک تربیتی پروگرام کی تقریب تقسیم اسناد سے خطاب کرتے ہوئے کہی، تقریب میں وزارت اطلاعات کے مختلف اداروں کے سربراہان اور زیر تربیت افسران کے علاوہ میڈیا ماہرین اور اسلام آباد کی مختلف یونیورسٹیوں کے پروفیسروں نے شرکت کی، سیکرٹری اطلاعات نے کہا کہ سوشل اور ڈیجیٹل میڈیا نے عام لوگوں تک اطلاعات کی رسائی کو سہل بنا دیا ہے،وزارت اطلاعات کے افسران تندہی سے کام کرتے چلے آ رہے ہیں تاہم اس امر کی ضرورت ہے کہ وزارت کے افسران تمام ضروری تربیتی کورسز میں دلجمعی سے شریک ہوں، ڈائریکٹر جنرل انفارمیشن سروس اکیڈمی نے کہا کہ ایک ماہ کے تربیتی پروگرام میں افسران کو میڈیا قوانین اور انتظامی امور میں دسترس کیساتھ ساتھ ڈیجیٹل اور سوشل میڈیا کے تمام ضروری امور سے متعلق آگاہی دی گئی ہے جس کیلئے ماہرین کی خدمات حاصل کی گئیں،ڈائریکٹر انفارمیشن سروس اکیڈمی غزالہ امبرین نے شرکاءکو کورس کے انعقاد کے بارے میں تفصیلی بریفنگ دی، تقریب کے آخر میں کورس میں افسران میں اسناد اور شیلڈز تقسیم کی گئیں۔