اسلام آباد (اے پی پی) سپریم کورٹ نے پشاور موٹروے کے لئے زمین کی قیمت خرید بڑھانے کے خلاف نیشنل ہائی وے اتھارٹی (این ایچ اے) کی اپیل مسترد قرار دیتے ہوئے این ایچ اے کو اراضی کے مالکان کو ادائیگیاں کرنے کا حکم دے دیا ہے۔ عدالت عظمیٰ میں منگل کو اپیل کی سماعت چیف جسٹس آف پاکستان جسٹس عمر عطاء بندیال کی سربراہی میں تین رکنی بنچ نے کی۔ دوران سماعت چیف جسٹس آف پاکستان عمر عطاء بندیال نے اہنے ریمارکس میں کہا کہ 2006ء سے این ایچ اے نے زمین لے رکھی ہے اور آج تک رقم ادا نہیں کی۔ انہوں نے کہا کہ شہریوں سے زبردستی زمین لے کر اور معاوضہ ادا کر کے بھی اراضی سے محروم کرنے کا مداوا نہیں ہوسکتا۔ اپنے گھر اور زمینیں چھوڑنے والوں کی زندگیاں اور خاندانی نظام تباہ ہو جاتا ہے۔ جسٹس اطہر من اللہ نے کہا کہ کوئی قیمت بھی بے گھر اور بے زمین کرنے والی پریشانی کا مداوا نہیں کر سکتی۔ انہوں نے مزید کہا کہ ہمارے خاندانی نظام میں آباؤ اجداد کی قبروں کی بہت اہمیت ہوتی ہے اور ان سے دوری بھی بڑا ظلم ہے۔ این ایچ اے کے وکیل نے اس موقع پر عدالت کو بتایا کہ پشاور موٹروے کے لئے 35 ہزار روپے فی مرلہ زمین خریدی گئی تھی۔ بعد ازاں ہائیکورٹ نے اضافہ کر کے اس کی قیمت 70 ہزار روپے کر دی۔ عدالت عظمی ٰنے اس موقع پر زمین کی قیمت میں اضافہ کے پشاور ہائی کورٹ کے فیصلہ کو درست قرار دیتے ہوئے این ایچ اے کی اپیل خارج جبکہ اراضی مالکان کو ادائیگیوں کا حکم جاری کرتے ہوئے اپیل کو نمٹا دیا۔