کوئٹہ(خ ن)وزیراعلیٰ میر عبدالقدوس بزنجو نے تعلیمی سال 2023 کے لئے کچی تا بارہویں جماعت کی نصابی کتابوں کی چھپوائی پبلی کیشن اور ان کی مفت تقسیم کے لئے فنڈز کی منظوری دے دی۔ واضح رہے کہ وزیر اعلیٰ نے یہ منظوری محکمہ سیکنڈری ایجوکیشن کی جانب سے ارسال کی جانے والی ایک سمری پر دی جس کے تحت صوبائی حکومت آئندہ سروے مکمل ہونے تک 500.00 ملین روپے کے اضافی فنڈز کا اجراء کرے گی اور اس کے لئے مختص فنڈز 556.300 کے ساتھ صوبائی حکومت مجوزہ 1056.300 ملین روپے کا اجراء مالی سال 2022-23 میں کرے گی ۔عالمی یوم تعلیم کی مناسبت سے وزیر اعلیٰ کے اس تعلیم دوست اقدام کا مقصد صوبائی حکومت کی تعلیمی ترجیحات کا تسلسل ہے جسے عوامی حلقوں کی جانب سے سراہا جا رہا ہے۔