اسلام آباد ( طاہر خلیل ) پنجاب اور خیبر پختونخوا اسمبلیوں کے عام انتخابات 12ا پریل تک کرانے کی تجویز ہے جبکہ قومی اسمبلی میں پی ٹی آئی کے مستعفی ارکان کی107 خالی نشستوں پر 16 مارچ تک ضمنی الیکشن کرائے جائینگے ، الیکشن کمیشن نے ابتدائی تیاریاں مکمل کر لیں چیف جسٹس کی منظوری کے بعد پنجاب اور خیبر پختونخوا اسمبلیوں کے انتخابات میں ڈسٹرکٹ ریٹرننگ افسر عدلیہ سے ہونگے ، قومی اسمبلی کے ضمنی اور دو صوبائی اسمبلیوں کے عام انتخابات پر اخراجات کا تخمینہ 30 ارب کے قریب ہو گا،قومی اسمبلی کی 107 خالی نشستوں پر ضمنی الیکشن اور 2 صوبائی اسمبلیوں کے مکمل انتخابات، الیکشن کمیشن کو3 ماہ میں دوہری تیاریاں مکمل کر نے کا بڑا چیلنج در پیش ہے ،معاشی دبائو میں انتخابی اخراجات بھی بڑھ گئے ، الیکشن کمیشن نے اکتوبر کے عام انتخابات کی تیاریوں کیلئے حکومت سے 45 ارب روپے مانگے تھے جس میں سے الیکشن کمیشن کو 18 ارب روپے مل گئے ان الیکشن کیلئے حکومت سے 10 سے 12 ارب روپے اضافی فنڈ حاصل کئے جائینگے ، خیبر پختونخوا اور پنجاب اسمبلیوں کی کٹ آف ڈیٹ 10 سے 13 اپریل ہے اس تاریخ تک پولنگ کرانا ہو گی جبکہ قومی اسمبلی کی 107 نشستوں پر الیکشن کرانے کی حتمی تاریخ 18 مارچ ہو گی الیکشن کمیشن کو آئندہ ہفتے تک تینوں انتخابی شیڈول جاری کرنا ہونگے انتخابی حلقوں کیلئے بیورو کریسی سے ڈسٹرکٹ ریٹرننگ افسروں اور ریٹرننگ افسروں کی تعیناتی کیلئے الیکشن کمیشن نے فہرستیں مکمل کر لیں تاہم ذرائع نے کہا کہ چیف الیکشن کمشنر سکندر سلطان راجا نے گزشتہ ہفتے چیف جسٹس آف پاکستان سے ملاقات کی تھی اور عدالتی افسروں کو ڈی آر اوز بنانے کی درخواست کی تھی چیف جسٹس نے الیکشن کمشنر کی درخواست منظور کرلی دونو ں صوبائی اسمبلیوں کے انتخابات میں ڈسٹرکٹ ریٹرننگ افسر عدلیہ سے ہونگے ، پنجاب کے 40 اورخیبر پختونخوا کے 36 اضلاع میں ڈسٹرکٹ سیشن جج ڈی آر او کے فرائض ادا کرینگے جبکہ پنجاب میں 297 اور کے پی میں 115 ریٹرننگ افسران ، پنجاب میں 594 اے آر اوز اور کے پی میں 230 اے آر اوز تعینات کئے جائینگے۔