قومی اسمبلی کی کوئی نمائندہ حیثیت نہیں کہ واپس جائیں ،فواد چوہدری

راولپنڈی ، اسلام آباد (خبرنگار) تحریک انصاف کے مرکزی سینئر نائب صدر فواد چوہدری نے کہا ہے کہ محدود تعداد میں اسمبلی جانے کا مقصد راجہ ریاض کو اپوزیشن لیڈر کے عہدے سے فارغ کرنا تھا ، اس قومی اسمبلی کی کوئی نمائندہ حیثیت نہیں کہ اس میں واپس جائیں۔ شہباز شریف حکومت 172 لوگوں کی حمایت کھو چکی ہے۔ گزشتہ روز ایک بیان میں انہوں نے کہا کہ امپورٹڈ وزیراعظم حکومت بچانے کیلئے لوٹوں پر انحصار کر رہے ہیں، راجہ ریاض کو بچانے کیلئے سپیکر کے اقدامات کے نتیجے میں اس وقت 40 فیصد نشستیں خالی ہو چکی ہیں۔ ملک انتخابات کے مزید قریب آ گیا ہے، اس بحران کا واحد حل قومی انتخابات ہیں، حکومت کتنا عرصہ عوام سے کترائے گی آخر فیصلہ لوگوں نے کرنا ہے اور فیصلہ ووٹ سے ہو گا، عمران خان کے میڈیا ایڈوائزر فیاض الحسن چوہان نے کہا کہ نگران حکومت کی جانب سے پنجاب میں انتخابات سے قبل دھاندلی کے ذریعے آئندہ الیکشن پر اثرانداز ہونے کا سلسلہ جاری ہے ، آئی جی پنجاب ، چیف سیکرٹری پنجاب سمیت متعدد انتظامی تبادلے خلاف قانون ہیں، آئین نگران حکومت کو کسی قسم کی ٹرانسفر پوسٹنگز کرنے کی اجازت نہیں دیتا، امپورٹڈ حکومت کی لائی گئی نگران حکومت چاہے جو مرضی کر لے ، آئندہ انتخابات میں عوام کا ووٹ عمران خان کے حق میں ہو گا،حسان خاور نے کہا کہ جمہوریت کے نام پر ملک میں گلی ڈنڈا کھیلا جا رہا ہے، تحریک انصاف کے 43 استعفے منظور کر کے 13جماعتوں اور 20 لوٹوں پر مشتمل شہباز شریف حکومت بچا لی گئی۔