چھاپوں کے دوران لاکھوں روپے مالیت کے نان ڈیوٹی پیڈ سگریٹ ضبط

اسلام آباد(مہتاب حیدر )ریجنل ٹیکس آفس راولپنڈی کے انفورسمنٹ نیٹ ورک کے ان لینڈ ریونیو اسکواڈ نے مصدقہ اطلاعات پر دو مختلف چھاپوں کے دوران لاکھوں روپے مالیت کے نان ڈیوٹی پیڈ سگریٹ کے کارٹن ضبط کرلئے۔ پہلے واقعے میں آئی آر ای این اسکواڈ نے جہلم کے ضلع سوہاوہ میں جی ٹی روڈ پر ایک ٹرک کو روکا جس میں مقامی برانڈ کے سگریٹ کے 70 کارٹن (7 لاکھ لاٹھیاں) موجود تھے۔ اس میں تقریبا 19 لاکھ روپے کی ٹیکس چوری شامل تھی، مالکان ڈیوٹی ادا کرنے کے حوالے سےکوئی دستاویزات یا انوائسز پیش نہیں کر سکے، جس کے بعد سگریٹوں کا غیر قانونی اسٹاک ضبط کرکے جہلم کے ایک گودام میں منتقل کردیا گیا ۔ ایک اور واقعہ میں دینا مارکیٹ میں ایک مقامی ڈیلر سے مختلف مقامی برانڈز کے نان ڈیوٹی پیڈ سگریٹ کے6 کارٹن (60.000 اسٹک) ضبط کر لیے گئے ،انہیں بھی ضلع جہلم میں ایف بی آر کے گودام میں منتقل کر دیا گیا۔ دونوں ضبطگیوں بارے مزید تفتیش جاری ہے۔