وفاقی محتسب غریبوں کی عدالت ،فوری انصاف کا سستا ذریعہ ،اعجاز قریشی

اسلام آباد (نمائندہ خصوصی ) وفاقی محتسب اعجاز احمد قریشی نے ادارے کے چالیسویں یومِ تاسیس کے موقع پر تقریب سے خطاب کرتے ہوئے کہا ہے کہ وفاقی محتسب سیکرٹیریٹ نے 40سالوں میں اب تک 19 لاکھ کے قریب شکایات نمٹا ئی ہیں ،پچھلے سال ہم نے بہت سے نئے اقدامات اُٹھائے اور سادہ وآسان دفتری طریقِ کار اختیار کرکے کسی اضافی بجٹ اور مزید افرادی قوت کے بغیر ایک سال میں اپنی کارکردگی میں 50 فیصد اضافہ کیا۔ وفاقی محتسب عوام کو فوری انصاف فراہم کرنے کا انتہائی سستا ذریعہ ہے، اسے آپ غریبوں کی عدالت بھی کہہ سکتے ہیں، جہاں نہ کوئی فیس ہے اور نہ ہی وکیل کاخرچہ ۔اس موقع پر پاکستان پوسٹ نے وفاقی محتسب کی طرف سے عوام کو مفت اور فوری انصاف فراہم کرنے کے 40 سال کے کامیاب سفر پر 20 روپے کا ایک یادگاری ڈاک ٹکٹ بھی جاری کیا ۔