شیخ عمران قتل کے ملزمان کو کیفرکردار تک پہنچایا جائے،ڈسٹرکٹ بار

راولپنڈی(نمائندہ جنگ) ڈسٹرکٹ بار راولپنڈی کی مجلس عاملہ کا اجلاس زیرصدارت نو منتخب صدر فیصل خان نیازی ہوا۔ اس موقع پر چند روز قبل قتل ہونے والے وکیل شیخ عمران کے کیس کی تفتیش کے اہم نکات اور ضلع کچہری کی سکیورٹی سے متعلق معاملات کا جائزہ لیا گیا۔اجلاس میں نومنتخب جنرل سیکرٹری راجہ محمد علی، نائب صدر شاہد حمید بھٹی، جوائنٹ سیکرٹری ملک تجمل جاوید کے علاوہ ممبر پنجاب بار کونسل بشارت اللہ خان، چوہدری توفیق آصف، چوہدری آصف لکھن، اسد محمود عباسی اور دیگر وکلاء بھی موجود تھے۔فیصل خان نیازی نے کہا کہ راولپنڈی ضلع کچہری کی سکیورٹی وکلاء اور سائلین کی جان و مال کی حفاظت اولین ترجیحات میں شامل ہیں اس بارے میں بہت جلد سیشن جج راولپنڈی اور سی پی او سید شہزاد ندیم سے بھی میٹنگ کرینگے۔ اجلاس میں شیخ عمران کے قتل کی شدید مذمت کرتے ہوئے ملزمان کو کیفرکردار تک پہنچانے کا مطالبہ کرتے ہوئے مرحوم کے درجات کی بلندی کے لئے دعا کی گئی۔