آصف زرداری نے پارک لین ریفرنس کو بھی چیلنج کردیا

25 جنوری ، 2023

اسلام آباد (خبر نگار) پاکستان پیپلز پارٹی کے رہنما اور سابق صدر آصف علی زرداری نے احتساب عدالت میں زیر سماعت جعلی اکائونٹسکے پارک لین ریفرنس کو بھی چیلنج کردیا ہے۔ منگل کے روز فاروق ایچ نائیک ایڈووکیٹ کے ذریعے نیب ترمیمی ایکٹ2022کے تحت احتساب عدالت میں دائر درخواست میں موقف اختیار کیا گیا ہے کہ نیب ترمیمی ایکٹ2022 کے بعد پارک لین ریفرنس اب احتساب عدالت کے دائرہ اختیار میں نہیں آتا۔ اس لئے استدعا ہے کہ عدالت ریفرنس واپس نیب کو بھجوائے یا بری کرے۔ واضح رہے کہ آصف علی زرداری وغیرہ کے خلاف جعلی اکاؤنٹس کا ہی ٹھٹھہ واٹر سپلائی ریفرنس اور 8ارب کی مشکوک ٹرانزکشن ریفرنس پہلے ہی نیب کو واپس بھجوائے جاچکے ہیں جبکہ میگامنی لانڈرنگ ریفرنس میں درخواستوں پر عدالت نے فیصلہ محفوظ کررکھا ہے۔