پنجاب و KP میں انتخابات، الیکشن کمیشن تیار، اپریل کی تاریخوں پر غور

25 جنوری ، 2023

اسلام آ باد(پی پی آ ئی) الیکشن کمیشن نے گورنرپنجاب اور خیبرپختونخوا سے رابطہ کرکے پنجاب اور خیبر پختونخوا میں انتخابات کی تاریخیں تجویزکردیں۔ذرائع کا کہنا ہے کہ انتخابات کیلئے9 اپریل سے 12 اپریل تک موزوں تاریخیں ہیں اور الیکشن کمیشن ان تاریخوں میں دونوں صوبوں میں انتخابات کیلئے تیار ہے۔ الیکشن کمیشن میں ہونے والے اہم اجلاس میں حکام نے بتایاکہ پولنگ اسٹیشنز اور ووٹرز لسٹیں تیارکرلی ہیں ، اجلاس میں چیف الیکشن کمشنرکی جانب سے انتخابی تیاریاں تیزکرنے کی ہدایت کی گئی۔چیف الیکشن کمشنرسکندرسلطان راجہ کی زیر صدارت ہونے والے اس اجلاس میں ممبران، صوبائی الیکشن کمشنرز اورتمام ونگزکے حکام شریک ہوئے۔ اجلاس میں پنجاب، کے پی کے اورضمنی انتخابات سے متعلق تیاریوں پر غور کرتے ہوئے کہا گیا کہ پریزائڈنگ افسران اور دیگر پولنگ عملے کی تقرری کا عمل جلد مکمل کیا جائے۔ ذرائع کے مطابق الیکشن کمیشن نے پنجاب اورخیبرپختونخوا اسمبلیوں کے عام انتخابات کیلئے 15 ارب روپے سے زائد کا تخمینہ لگایا ہے ، قومی اسمبلی کی 64 نشستوں میں ضمنی انتخابات پر5 ارب روپے سے زائد کے اخراجات آئینگے۔وفاق کی جانب سے الیکشن کمیشن انتخابات کی مد 5 ارب روپے کی رقم مل چکی ہے، مزید فنڈ کیلئے الیکشن کمیشن نے وفاقی حکومت کو خط لکھنے کا فیصلہ کیا ہے۔ الیکشن کمیشن نے پنجاب کی 297 اورخیبر پختونخوا کی 115جنرل نشستوں پرانتخابات کرانے ہیں، اسکے ساتھ ساتھ قومی اسمبلی کی 64 جنرل نشستوں پربھی انتخابات کرانے ہیں۔ واضح رہے کہ پنجاب اورخیبرپختونخوا میں انتخابات کی حتمی تاریخ کا فیصلہ گورنر کرینگے اور حتمی تاریخ کے تعین کے بعدالیکشن کمیشن انتخابات کاشیڈول جاری کرے گا۔