ECC آج پائیدار ترقی اہداف پروگرام کیلئےضمنی گرانٹ کی منظوری دیگی

25 جنوری ، 2023

اسلام آباد ( تنویر ہاشمی ) کابینہ کی اقتصادی رابطہ کمیٹی رواں سال کیلئے پائیدار ترقی کے اہداف پروگرام کیلئے تین ارب روپے کی ضمنی گرانٹ کی آج منظوری دیگی، یہ رقم ارکان اسمبلی کےذریعے خرچ کی جائے گی ، ای سی سی کا اجلاس وزیر خزانہ اسحاق ڈار کی زیر صدارت ہوگا جس میں 54 نئی ادویات کی ریٹیل قیمتوں کو مقرر کرنے اور ایک دوائی کی ریٹیل قیمت میں اضافہ کی منظوری دی جائیگی اس کی سفارش ڈرگ پرائس کمیٹی نے اپنے 52ویں اجلاس میں دی ہے، ای سی سی میں پاکستان سنٹرل کاٹن کمیٹی ( پی سی سی سی ) کے ملازمین کو پنشن اور الائوئنسز کی ادائیگی کیلئے 66 کروڑ66لاکھ40ہزارر وپے کی ضمنی گرانٹ کی بھی منظوری دی جائیگی، پاکستان ایل این جی لمیٹڈاورمیسرز سوکر کمپنی کے مابین فریم ورک معاہدے کی منظوری کا بھی امکان ہے، ای سی سی میں ہالہ بلاک میں آدم ایکس ون ڈویلپمنٹ اینڈ پروڈکشن کیلئے توسیع ، گدو مین عمیر ایس ای ون میں ٹیسٹنگ ویل کی توسیع کی منظوری بھی دی جائیگی ، ای سی سی میں سپریم کورٹ کی عمارت کی مرمت اور مختلف شہروں میں ججوں کے رہائشی ریسٹ ہائوسز اور ذیلی دفاتر کی مرمت اور مینٹیننس کیلئےاضافی فنڈز مختص کرنے کا بھی امکان ہے، ای سی سی میں گندم کی پری شپمنٹ انسپکشن کے انعقاد کیلئے ٹریڈنگ کارپوریشن آف پاکستان کے 6انٹرنیشنل پری شپمنٹ انسپکشن ایجنسیز کی منظوری کا امکان ہے۔