پنجاب، سابق حکومت کے دور میں ڈینگی کورونا ورکرز کی جعلی بھرتیاں، ڈسٹرکٹ ہیلتھ اتھارٹی لاہور میں مزید 19کروڑ روپے کی مالی بد انتظامی کا انکشاف

لاہور(محمد صابر اعوان سے)پنجاب کی سابق حکومت کے دور میں لاہورمیں ڈینگی اور کورونا ورکرز کی جعلی بھرتیوں کی مد میں ڈسٹرکٹ ہیلتھ اتھارٹی لاہور میں مزید 19کروڑ روپے روپے کی مالی بد انتظامی کا انکشاف ہوا ہے۔اتھارٹی کی انتظامیہ نے بھرتی کا طریقہ کار اور میرٹ طے کیے بغیر ان ملازمین کی بھرتی کی اور ، ان ملازمین کو تنخواہوں کی مد میں ایک سال کے دوران 19کروڑ روپے سے زائد کی ادائیگیاں بھی کر دی گئیں۔ محکمانہ آڈٹ کی دستاویزات کے مطابق لاہو رکے مختلف ٹاونز جن میں نشتر ٹاؤن،علامہ اقبال ٹاؤن،عزیز بھٹی ٹاؤن،کینٹ ٹاؤن اور داتا گنج بخش ٹاؤن میں 2020-21 کے دوران ڈیلی ویجز پر ملازمین کو قاعدہ قانوں کے برعکس بھرتی کیا گیا، ان ملازمین کو تنخواہوں کی مد میں 19کروڑ روپے سے زائد کی ادائیگیاں بھی کر دی گئیں۔ دوران ۤآڈٹ یہ بات سامنے آئی کہ ڈیلی ویجز ملازمین کی بھرتی سے پہلے محکمہ خزانہ پنجاب سے منظوری ہی نہیں لی گئی، ڈیلی ویجز ملازمین کی بھرتی کا طریقہ کار اور میرٹ طے نہیں کیا گیا، ملازمین کی بھرتی کے حوالے سے کوائف کو ریکارڈ ہی نہیں کیا گیا، ڈیلی ویجز ملازمین کی بھرتیوں بارے درخواستیں اور جوائننگ رپورٹ کا ریکارڈ بھی نہیں ملا، آڈٹ رپورٹ کے مطابق ڈی ایچ او نشتر ٹاؤن میں 4کروڑ98لاکھ ، ڈی ڈی ایچ او علامہ اقبال ٹاون میں 5کروڑ68 لاکھ روپے ، عزیز بھٹی ٹاون کو 3کرؤڑ12لاکھ ، کینٹ ٹاون کو 3کروڑ30لاکھ اور داتا گنج بخش ٹاون میں 2کروڑ69لاکھ ان ملازمین کی تنخواہ کی مد میں ادا کئے گئے ۔