عمران سے پرویز الٰہی کی ملاقات، نگران وزیراعلیٰ کی تقرری چیلنج کرنے پر اتفاق

لاہور(نمائندہ خصوصی،مانیٹرنگ سیل )پاکستان تحریک انصاف کے چیئرمین و سابق وزیر اعظم عمران خان سے سابق وزیراعلیٰ پنجاب چودھری پرویزالٰہی نے ملاقات کی۔ملاقات کی اندرونی کہانی سامنے آگئی۔ سیکرٹری جنرل اسد عمر، فواد چودھری، سینیٹر اعظم سواتی اور حماد اظہر نے بھی شرکت کی ۔ذرائع کے مطابق ملاقات میں عمران خان اور پرویز الہٰی نے نگران وزیراعلیٰ پنجاب کی تقرری چیلنج کرنے پر اتفاق کیا، محسن نقوی کی تقرری کے معاملے پر عدالت سے آج رجوع کرنےکا فیصلہ کیا گیا ۔ذرائع کا کہنا ہے ملاقات میں احمد اویس نے آئینی وقانونی شقوں سے متعلق بریفنگ دی۔ذرائع کے مطابق دونوں رہنماؤں کی ملاقات میں آئندہ انتخابات سمیت دیگر سیاسی معاملات پربھی گفتگو ہوئی، ملاقات میں موجود دیگر پی ٹی آئی رہنماؤں نے پرویز الہٰی کو اپنے احتجاجی لائحہ عمل سے بھی آگاہ کیا۔ذرائع کا کہنا ہے کہ ملاقات میں نگران وزیراعلیٰ کی جانب سےکی جانے والی تعیناتیوں پر اظہار تشویش بھی کیا گیا۔عمران خان سے ملاقات کے بعد میڈیا سےگفتگو کرتے ہوئےپرویز الہٰی نے کہا ہے پنجاب میں متنازعہ ترین افسران کی تعیناتیاں کی جارہی ہیں، خاص طور پر پی ٹی آئی مخالف شہرت رکھنے والے افسران کو تعینات کیا جارہا ہے لیکن عمران خان کرپٹ مافیا کے آگے ڈٹ کر کھڑے ہیں، انتخابات میں شکست پی ڈی ایم کا مقدر بنے گی اور آنے والا وقت صرف عمران خان کا ہے۔انہوں نے کہا کہ الیکشن کمیشن شفاف الیکشن کے لیے ذمہ داری ادا کرنے میں ناکام ہے، الیکشن کی تاریخ نہ دیکر آئینی ذمہ داری کی خلاف ورزی کی جارہی ہے،دریں اثنا وزیر اعلی ٰپنجاب پرویز الہٰی نے سپیکر سبطین خان سے ملاقات کی۔