تمام ممالک کو موسمیاتی تبدیلیوں سے نمٹنے کیلئے ہنگامی بنیادوں پر کام کرنا ہوگا،بلاول بھٹو

اسلام آباد (وقائع نگار) وزیر خارجہ بلاول بھٹو زرداری نے کہا ہے کہ تمام ممالک کو موسمیاتی تبدیلیوں سے نمٹنے کیلئے ہنگامی بنیادوں پر کام کرنا ہوگا، گلوبل وارمنگ کی وجہ سے پاکستان میں گلیشئر تیزی سے پگھل رہے ہیں، دنیا کو معاشی ، موسمیاتی تبدیلی اور اسلاموفوبیاجیسے مسائل کا سامنا ہے پاکستان مسائل کے حل کیلئے تمام ممالک کیساتھ ملکر کام کرنے پر یقین رکھتا ہے، پاکستان کو تاریخ کے بدترین سیلاب کا سامنا کرنا پڑا، حالیہ سیلاب سے 30ارب ڈالر کا نقصان ہوا،متاثرین کی بحالی ترجیح ہے، گزشتہ روز ازبکستان کے دارالحکومت تاشقند میں اقتصادی تعاون تنظیم (ای سی او) کے 26 ویں وزارتی کونسل کے اجلاس سے خطاب کرتے ہوئے انہوں نے خطے کی بہتری کیلئے ملکر کام کرنے کی ضرورت پر زور دیتے ہوئے کہا کہ اب اٹھائے جانیوالے اقدامات ہمارے مستقبل کو طے کرینگے پاکستان مذاکرات کے ذریعے مسائل کے حل پر یقین رکھتا ہے ہمیں خطے کی بہتری کیلئے ملکر کام کرنے کی ضرورت ہے،علاوہ ازیں بلاول بھٹو زرداری نے ترکیہ کے وزیر خارجہ سےبھی ملاقات کی جس میں دونوں نے دوطرفہ تعلقات کے دائرہ کار کو مزید مضبوط بنانے کے عزم کا اعادہ کیا، دونوں وزرائےخارجہ نے عالمی اور علاقائی اہمیت کے امور پر بھی تبادلہ خیال کیا۔