پنجاب میں تقرر و تبادلے،PTI کا الیکشن کمیشن سے رجوع کا فیصلہ

لاہور (خصوصی رپورٹر،آئی این پی )پاکستان تحریک انصاف نے سانحہ 25 مئی میں ملوث اور پی ڈی ایم قیادت کے قریب افسران کی پنجاب میں تقرری رکوانے کے لئے الیکشن کمیشن سے رجوع کا فیصلہ کیا ہے۔ ذرائع پی ٹی آئی کے مطابق تحریک انصاف نے 18 افسران کی پنجاب میں تقرری رکوانے کے لئے الیکشن کمیشن کو درخواست دینے کا فیصلہ کیا ہے۔ پی ٹی آئی بلال صدیق کمیانہ اور سمیر سید کے خلاف درخواست دے گی، تحریک انصاف کی جانب سے سہیل ظفر چٹھہ، نبیل اعوان اور دیگر افسران کے خلاف بھی درخواست دی جائے گی۔ خصوصی رپورٹرکے مطابق پاکستان تحریک انصاف کے مرکزی سینئر نائب صدر فواد چوہدری اور سینٹرل پنجاب کے جنرل سیکرٹری حماد اظہر نے زمان پارک کے باہر مشترکہ پریس کانفرنس کرتے ہوئے کہاکہ عدلیہ کو اپنا کردار ادا کرنا چاہئے، 25 مئی میں ملوث افراد کو تعینات نہ کیا جائے۔ہمارے ساتھ زیادتیوں کا سلسلہ بند نہ ہوا تو آپ کو بھی جواب ملے گا، پی ٹی آئی نے نگران وزیراعلیٰ پنجاب کو مسترد کر دیا ہے، اصل چہرے محسن نقوی کے پیچھے چھپے ہوئے ہیں، تین دن تک اسمبلی سیکرٹریٹ بند تھا، آج استعفے منظور ہو گئے ہیں۔ فواد چوہدری نے کہاکہ اگر گورنر پنجاب انتخابات کی تاریخ نہیں دیں گے تو ان کو آرٹیکل 6 کا سامنا کرنا پڑے گا، ان کے گلے میں وہی رسے پڑیں گے جو آئین میں دیے ہیں، اس وقت قومی اسمبلی میں 40فیصد نشستیں خالی ہیں، ملک کے ایوانوں میں 65فیصد نشستیں خالی ہیں، خرم دستگیر دکانوں میں جا کر پائے کھا رہے ہیں،میاں حماد اظہر نے کہاکہ الیکشن کمشنر کلرک کی طرح بیٹھ کر دستخط کر دیتے ہیں، محسن نقوی کے خلاف عدالت میں جا کر ثبوت دیں گے، جمہوریت میں جو لوگ مداخلت کریں گے ہم اقتدار میں آ کر ان کو مثال بنائیں گے۔