نگراں وزیر اعلیٰ خیبرپختونخوا نے پٹرول کی قلت کا نوٹس لے لیا

پشاور (این این آئی)پٹرول کی قیمتوں میں اضافے کی افواہوں کے خیبرپختونخوا میں تیل کی قلت پیدا ہو گئی جس کا نگراں وزیر اعلی محمد اعظم خان نے نوٹس لے لیا۔نگراں وزیر اعلی محمد اعظم خان نے ہدایت کی کہ عوام کیلئے تکلیف کا باعث بننے والے عناصر کے ساتھ قانون کے مطابق نمٹا جائے، انہوں نےمعاملے پر چیف سیکرٹری کو صوبہ بھر کے ڈپٹی کمشنرز سے رپورٹ طلب کرنے کی بھی ہدایت کر دی۔میڈیا رپورٹ کے مطابق صوبے میں آٹے کی دستیابی کی صورتحال کا نوٹس لے لیا گیا۔نگراں وزیر اعلی نے کہا کہ صوبہ بھر کے پیٹرول پمپس میں صارفین کو پٹرول کی ہمہ وقت فراہمی کو یقینی بنانے کیلئے اقدامات کئے جائیں۔واضح رہے گزشتہ دو روز میں ڈالر کی قیمت میں بے تحاشہ اضافے کے بعد سے تیل کی قیمتیں بڑھنے سے متعلق بھی خبریں زیر گردش کرنے لگیں جس کی وجہ سے خیبرپختونخوا میں پمپ مالکان نے پٹرول کی فروخت کم کر دی جبکہ صارفین کو تیل کے حصول میں دشواری کا سامنا رہا۔