صوبائی اسمبلی کے الیکشن نہ کرانا دھاندلی تصور کرینگے‘ سینیٹر عبدالقادر

اسلام آباد(پ ر)پاکستان تحریک انصاف کے مرکزی رہنما چیئرمین اسٹینڈنگ کمیٹی سینیٹر عبدالقادر نے کہا ہے کہ الیکشن کمیشن کی جانب سے نیشنل اسمبلی کے ضمنی انتخابات کی تاریخ دینا اور صوبائی اسمبلیوں کی تاریخ نہ دینا باعث حیرت ہے۔ اگر حکومت کے پاس ریسورسز یا سیکورٹی کا مسئلہ ہے تو قومی اسمبلی کے الیکشن کے لئے بھی انہی مسائل کا سامنا کرنا ہوگا جو نشستیں پی ٹی آئی کے ایم این ایز کے استعفوں کے بعد خالی ہوئی ہیں۔ بیان میں انہوں نے کہا کہ اگر قومی اسمبلی کے حلقوں کے انتخابات کرائے جاسکتے ہیں اور صوبائی اسمبلی کے حلقوں پر نہیں کرائے جارہے تو اس کا مطلب بددیانتی ہے اور یہ اقدام بڑے پیمانے پر دھاندلی تصور کیا جائے گا۔ انہوں نے کہا کہ آئین کے تحت صوبائی اسمبلی کی تحلیل کے بعد 90 روز کے بعد الیکشن کرانا لازمی ہے جس میں حکمران اور پی ڈی ایم راہ فرار چاہتی ہے انہوں نے کہا کہ فوری انتخابات عوام کا مطالبہ ہے جس پر حکمرانوں کو سنجیدہ اقدامات اٹھانے ہوں گے۔