فلمیں نہ ہونے کی وجہ سے کراچی کا کیپری سینما ایک ہفتہ سے بند

کراچی (پی پی آئی)فلمیں نہ ہونے کی وجہ سے کراچی کا کیپری سینما ایک ہفتہ سے بند ہے اور مزید 2 فروری تک بند رہیگا۔ اس حوالے سے سوشل میڈیا پر کیپری سینما کی انتظامیہ نے فلمی شائقین کو آگاہ بھی کردیا ہے۔کیپری سینما کے جنرل منیجر عزیزخٹک نے کہا کہ اگر پاکستانی فلم دی لیجنڈ آف مولا جٹ نہ ہوتی تو سینما ویران ہوجاتے۔ انہوں نے کہا کہ دی لیجنڈ آف مولا جٹ نے ڈھائی مہینے تک سینما گھروں کو سہارا دیا پھرہالی وڈ کی فلم اوتار، دی وے آف واٹر ریلیز ہوئی۔ اس کی وجہ سے بھی سینما گھروں میں کچھ رونق رہی۔ تاہم اس کے باوجود اب ان کے پاس کوئی نئی فلمیں نہیں جو وہ فلمی شایقین کو دیکھا سکیں۔ عزیز خٹک کا کہنا تھا کہ وہ نہیں جانتے کہ پاکستانی پروڈیوسرز کیا سوچ رہے ہیں ؟ان کا کہنا تھا اس وقت بھی تقریباً 25 سے 30 فلمیں تیار ہیں لیکن فلم پروڈیوسر کیوں عید کا انتظار کرتے ہیں ؟ اگر صرف عید پر ہی فلمیں لگائی جائیں گی تو سال کے باقی مہینے کیا کیا جائے گا۔ ؟ سینما کو کیسے چلایا جائے ؟کراچی کا پرانا سینما گھر کیپری سینما جو تقریبا 3 برس تک کورونا وبا کی پابندیوں کے باعث بند رہا۔جب سینما گھر کھلا ہے تو اس میں لگانے کے لئے فلموں کی تعداد نہ ہونے کے برابر ہے۔