آئین میں گنجائش موجود ، نگراں حکومتوں کی مدت میں تو سیع کا انحصار حالات پر ہے، وزیرقانون

اسلام آباد (این این آئی)وفاقی وزیرقانون اعظم نذیر تارڑ نے کہا ہے کہ نگران حکومتوں کی مدت میں توسیع کا انحصار حالات پر ہے، آئین میں نگراں حکومتوں کی مدت میں توسیع کی گنجائش موجود ہے ،تمام فیصلے الیکشن کمیشن کو کرنے ہیں، نئی مردم شماری کا اعلان ہوچکا ہے ، انتخابات کونسی مردم شماری کے تحت ہوں گے ابھی کچھ کہنا قبل ازوقت ہے۔ ایک انٹرویو میں اعظم نذیر تارڑ نے کہاکہ خدانخواستہ اگر امن و امان کی صورتحال یا معاشی صورتحال ایسی بنے توآئین میں ایسی شقیں موجود ہیں کہ آئین میں رہتے ہوئے نگراں حکومتوں کے وقت کی کمی بیشی کی جاسکتی ہے ۔وزیرقانون نے کہا کہ انتخابات کے انعقاد کیلئے آئینی وقت نوے روز ہے تاہم ماضی میں الیکشن کمیشن کی جانب سے انتخابات کی تاریخ میں تبدیلی کی مثالیں موجود ہیں ،تمام فیصلے الیکشن کمیشن کو کرنے ہیں وہ آئین اور الیکشن ایکٹ کو سامنے رکھتے ہوئے انتخابات کی تاریخ دیگا ۔ایک سوال کے جواب میں وفاقی وزیرقانون نے کہا کہ نئی مردم شماری کا اعلان ہوچکا ہے ، انتخابات کون سی مردم شماری کے تحت ہوں گے، ابھی کچھ کہنا قبل ازوقت ہے ۔انہوں نے کہاکہ الیکشن کمیشن پی ٹی آئی کے دور حکومت میں ان کی مشاورت سے بنا، چیف الیکشن کمشنر عمران خان کے نامزد شدہ ہیں ،اگر الیکشن کمیشن سے میرٹ پر تحریک انصاف کے حق میں فیصلے نہیں آرہے تو کسی کا قصور نہیں ،الیکشن کمیشن نے متفقہ طور ہر محسن نقوی کو نگران وزیراعلیٰ پنجاب بنایا۔