ریکو ڈک معاہدے میں بلوچستان کے مفادات کاتحفظ یقینی بنایا، قدوس بزنجو

کوئٹہ(خ ن)وزیراعلیٰ بلوچستان میر عبدالقدوس بزنجو نے کہا ہے کہ صوبے کی قیمتی معدنیات ہمارا اثاثہ اور ہمارے روشن مستقبل کی ضمانت ہیں، ہم نے اپنے معدنی ذخائر کے حوالے سے تمام فیصلے سوچ سمجھ کر کرنے ہیں جیسا کہ ہم نے ریکو ڈک معاہدے میں بلوچستان کے مفادات اور عوام کے حقوق کے تحفظ کو یقینی بنایا ان خیالات کا اظہار انہوں نے محکمہ معدنیات سے متعلق بعض اہم امور کے جائزہ اجلاس کے دوران کیا صوبائی وزیر معدنیات مبین خان خلجی چیف سیکرٹری عبدالعزیز عقیلی سیکرٹری معدنیات سیدال خان لونی اور دیگر متعلقہ حکام بھی اجلاس میں شریک تھے جنہوں نے اجلاس کو بریفنگ دی وزیراعلیٰ نے کہا کہ اپنے معدنی ذخائر کو صیح معنوں میں بروئے کار لاکر ہم اپنی آنے والی نسلوں کے مستقبل کو محفوظ و تابناک بنا سکتے ہیں اور یہ ہماری اور ہر آنے والی حکومت کی بھی ذمہ داری رہیگی وزیراعلیٰ نے کہا کہ اللہ تعالیٰ کا شکر ہے کہ اس نے ہمیں صوبے کے اثاثہ جات کے تحفظ اور انہیں بہترین سمت میں بروئے کار لانے کی ہمت اور توفیق عطا کی اور ہم عوام کے سامنے بھی سرخرو ہیں، انہوں نے ہدایت کی کہ ایسی حکمت عملی وضع کی جائےجس پر عمل کرتے ہوئے معدنی وسائل کا فائدہ صوبے اور عوام کو ملے اس حوالے سے کوئی بھی کوتاہی نہیں ہونی چاہئے۔