راولپنڈی اسلام آباد سمیت بعض علاقوں میں بارش اور پہاڑوں پربرفباری کا امکان

اسلام آباد (خصوصی نمائندہ) آئندہ24 گھنٹوں کے دوران راولپنڈی اسلام آباد، خطۂ پوٹھو ہار، خیبر پختونخوا، کشمیر، گلگت بلتستان، شمال مشرقی و وسطی پنجاب اور شمالی بلوچستان میں تیز ہواؤں اور گرج چمک کے ساتھ بارش اور پہاڑوں پربرفباری کا امکان ہے۔ محکمہ موسمیات کے مطابق ملک کے بیشتر مغربی اور بالائی علاقوں میں مطلع ابرآلود رہیگا ۔ تاہم شمال/شمال مغربی بلوچستان، خیبر پختونخواہ ، گلگت بلتستان،کشمیر اور ملحقہ پہاڑی علاقوں میں گرج چمک کے ساتھ بارش اور پہاڑوں پربرفباری کا امکان ہے۔ اس دوران پہاڑی علاقوں میں درمیانی سے شدیدبرفباری متوقع ہے۔جبکہ بالائی علاقوں میں چندمقامات پر موسلا دھار بارش/ژالہ باری بھی ہو سکتی ہے۔گذشتہ 24 گھنٹوں کے دوران ملک کے بیشتر علاقوں میں موسم سرد اور خشک جبکہ بالائی علا قوں اور شمالی بلوچستان میں شدید سرد رہا۔