خصوصی افراد کوسہولتیں دینے کے قانون پرعملدرآمد کا روڈ میپ طلب

لاہور (اے پی پی) لاہور ہائیکورٹ نے پنجاب میں معذور افراد کوسہولتوں کی فراہمی کی درخواست پر پنجاب کے تمام محکموں سے قانون پرعمل درآمد کا روڈ میپ طلب کرلیا۔سرکاری وکیل نے عدالت کو بتایاکہ پنجاب ان پاورمنٹ آف پرسنز ود ڈس ایبیلٹی ایکٹ 2022 منظور کیا گیا ہے،تمام محکموں کو ایکٹ پر عملدرآمد کے احکامات جاری کر دئیے گئے ہیں۔درخواست گزار جوڈیشل ایکٹوازم پینل کے وکیل اظہر صدیق کی جانب سے عدالت کو بتایاگیاکہ معذور افراد کے حقوق کے تحفظ کا قانون منظورہوگیاہے مگرعمل درآمد نہیں ہورہا،قانون میں معذور افراد کاسرکاری نوکریوں میں تین فیصد کوٹہ مختص ہے مگر وہ نظرانداز کئے جارہے ہیں،معذور افراد کے ساتھ مذاق کرنے والوں کو ابھی تک سزا نہیں دی جاسکی،استدعا ہے معذور افراد کو پبلک ٹرانسپورٹ میں خصوصی سہولتیں اور دیگر قانونی حقوق کی فراہمی کا حکم دیاجائے ۔ عدالت نے پنجاب کے تمام محکموں سے قانون پرعمل درآمد کا روڈ میپ طلب کرتے ہوئے سماعت 20 فروری تک ملتوی کر دی۔