لاپتہ افرادسے متعلق 7031مقدمات نمٹادیئے،رپورٹ سپریم کورٹ میں جمع

اسلام آباد (اے پی پی)لاپتہ افراد انکوائری کمیشن نے پیش رفت رپورٹ سپریم کورٹ میں جمع کرادی گئی، جس کے مطابق لاپتہ افرادسے متعلق7031مقدمات نمٹادیے گئے، گزشتہ ماہ91کیسزجب کہ اب تک مجموعی طور پر9ہزار 294مقدمات دائر کیے گئے۔عدالت عظمی میں جمع کرائی جانے والی رپورٹ میں31جنوری 2023ء تک کے دائر اور نمٹائے گئے مقدمات کی تفصیلات شامل ہیں۔ رپورٹ میں مزید بتایا گیا ہے کہ گزشتہ ماہ کے دوران لاپتہ افراد کے حوالے سے 91 مقدمات دائر ہوئے اور 31 جنوری 2023ء تک مجموعی طور پر 9 ہزار 294 مقدمات دائر ہوئے۔ جن میں سے مجموعی طور پر 7ہزار 31 مقدمات نمٹائے گئے ہیں۔ اس وقت لاپتہ افراد کمیشن کے پاس دو ہزار 256 مقدمات زیر التوا ہیں۔ واضح رہے کہ گزشتہ ایک ماہ کے دوران 37 مقدمات نمٹائے گئے ہیں جبکی جنوری 2023ء کے دوران 27 لاپتہ افراد کو ٹریس کیا گیا ہے۔ اسی طرح گزشتہ ایک ماہ میں 24 لاپتہ افراد کو بازیاب بھی کرایا گیا۔ رپورٹ کے مطابق تین افراد مختلف مقدمات کی وجہ سے جیلوں میں بند ہیں، 10 مقدمات لاپتہ افراد سے متعلق نہ ہونے کی بنیاد پر نمٹا دیئے گئے۔ جنوری 2023ء کے دوران کل مقدمات میں سے صرف 77 مقدمات بلوچستان سے متعلق ہیں۔ واضح رہے کہ سپریم کورٹ میں جمع کرائی گئی پیشرفت رپورٹ میں مارچ 2011ء تا جنوری 2023ء تک کے اعداد و شمار دیئے گئے ہیں۔