توہین الیکشن کمیشن ،عمران خان ،دیگر کیخلاف سماعت14فروری تک ملتوی

اسلام آ باد(پی پی آئی) پی ٹی آئی چیئرمین عمران خان، پارٹی سیکرٹری جنرل اسد عمر اور سینئر رہنما فواد چوہدری کے خلاف توہین الیکشن کمیشن کیس میں معاون وکیل نے کہا کہ آئندہ سماعت تک شو کاز نوٹس کا جواب جمع کروا دیں گے جس کے بعد مزید سماعت14فروری تک ملتوی کر دی گئی۔عمران خان، فواد چوہدری اور اسدعمر کے خلاف توہین الیکشن کمیشن کیس کی سماعت ممبر سندھ نثار درانی کی سربراہی میں 4 رکنی کمیشن نے کی۔ پی ٹی آئی کے سیکرٹری جنرل اسد عمر اور وکیل انور منصور الیکشن کمیشن میں پیش ہوئے۔ممبر نثار درانی نے کہا کہ آپ شوکاز نوٹس کا جواب جمع کروائیں جس پر وکیل اسد عمر نے کہا کہ میں مصروف تھا، جواب جمع کروانے کے لئے 4 دن کا وقت دیا جائے۔معاون وکیل نے کہا کہ اسد عمر، عمران خان اور فواد چوہدری کے وکیل فیصل چوہدری راستے میں ہیں، آئندہ سماعت پر اعتراضات پر دلائل دوں گا، اس پر ممبر بلوچستان نے کہا کہ آئندہ سماعت پر تو فرد جرم عائد کریں گے۔وکیل اسد عمر نے کہا کہ سپریم کورٹ کہہ چکی ہے کہ پہلے اعتراضات پر فیصلہ کریں، بیرون ملک جا رہا ہوں، واپسی پر دلائل دوں گا۔بعدازاں الیکشن کمیشن نے سماعت 14 فروری تک ملتوی کردی۔