معیشت کا قاتل و مہنگائی کا مجرم تقریروں سےمظلوم نہیں بن سکتا،مریم اورنگزیب

اسلام آباد( نمائندہ خصوصی)وفاقی وزیر اطلاعات و نشریات مریم اورنگزیب نے عمران خان کو مخاطب کرتے ہوئے کہا کہ تم ہی ملک میں دہشتگردی کے سہولت کار ہو، پاکستانی معیشت کا قاتل اور مہنگائی کا مجرم تقریروں سے کبھی مظلوم نہیں بن سکتا۔بدھ کو عمران خان کے خطاب پر اپنے ردعمل میں وزیر اطلاعات مریم اورنگزیب نے کہا کہ جس نے این آر او دینے پہ مجبور کیا اُسی کو تا حیات ایکسٹینشن دینے کی آفر ؟ تم نے تسلیم کر لیا کہ چیف آف آرمی سٹاف کے عہدے کو اپنی سیاست کی نذر کرنا چاہتے تھے۔ ادھروزیر اطلاعات و نشریات مریم اورنگزیب نے تھانہ مکڑوال میانوالی میں دہشتگردحملہ ناکام بنانے پر پنجاب پولیس کو خراج تحسین پیش کرتے ہوئے کہا کہ دہشتگردوں کے خاتمے کیلئے پنجاب پولیس اور سی ٹی ڈی کا جذبہ اور کارکردگی لائق تحسین ہے۔بدھ کو اپنے بیان میں مریم اورنگزیب نے کہا کہ دہشتگردی کے خاتمے کیلئے پولیس اور سی ٹی ڈی کو جدید ہتھیاروں، ٹیکنالوجی اور تربیت سے مزید مظبوط بنانا وقت کی ضرورت ہے۔ انہوں نےکہا کہ قوم کو اپنی فورسز پر فخر ہے، دہشت گردی کے خلاف افسران اور جوانوں کے جذبے کو سلام پیش کرتے ہیں۔